الميزة التنافسية
ولد عمك أحسن منك 🫵🏼
عنده بيت .. و أنت تملك شقة!
كلكم تملكون “مسكن” لكن تختلفون بالميزة؛ هو يقدر يوقف سيارته ببيته، بينما أنت تدور موقف لسيارتك🏠
و هنا نجسد لكم معنى
الميزة التنافسية Competitive Advantage؛
و اللي توصّل منتجك للتفوق على باقي الخيارات الموجودة بالسوق قدام العميل.
بمعنى آخر: هي السبب وراء شراء منتجك أو اختيار خدمتك رغم إغراءات المنافسين😉
تعالوا نتعرف على الخلطة السرية للميزة التنافسية🪄
أولًا الميزة الفريدة لمنتجك ✨
اسأل نفسك، وش بيستفيد عميلي من منتجي؟
دوّر على ثغرة بالمجتمع و سدّها بميزتك!
ثانيًا مين عملائك 👨👩👧👧؟
عشان ما تضيع بالدوشه.. حدد سوقك المُستهدف. مين الفئة اللي بتلقي إهتمام لمنتجك بشكل كبير؟
مثل ما تفاعلوا عملاء شي ان البنات مع منتجات SHEGLAM الجديدة🔥
ثالثًا اعرف منافسينك 🥷🏻
مو شرط منافسك يكون شركة كبيرة، ولا محل تجاري!
منافسك هو أي بائع يوفر منتجك مع ميزات تنافسية أكثر🤩
وعلى هالطاري.. كثرت الكافيهات،تعددت أنواع المحاصيل، واختلفت التبخيرات ☕️
لكن أول مكان يطري ببالنا إذا اشتهينا قهوة.. أكييد ستاربكس!
و شركة ستاربكس أفضل مثال لما نطري الميزة التنافسية، وميزتهم هي (ولاء العميل) ⚡️
بالرغم من زيادة أسعارهم ما زلنا نرغب بستاربكس ولا تغيّر ولاءنا لهم .. كيف حققوا هالشيء بدون مانحس؟
نتجت هذي الميزة التنافسية لتركيزهم على الجودة المُقدمة بقهوتهم من ناحية نوع القهوة،
الآلات المُستخدمة للتحضير، وخدمة العملاء بأجود المحاصيل ✨
وبعبارة أخرى؛ ستاربكس “حافنا حووف” بس عشان يرضي كل عميل يختاره على منافسينه لطلب قهوته ☕️🤍
ونقدر نقول بإن سبب استمرار العميل بالعودة لستاربكس؛ هو لأن التجربة دائمًا تكون جديدة😍
و طبعًا مافيه مجال إلا له معوقات بتسألون ‼️طيب هذي ميزة كيف بيكون لها معوقات؟
ما عليكم.. بنجاوبكم 😎
صح قلنا تقدر تتميز بمنتجك، لكن فيه شركات مو بقدرتك تنافسهم!
والميزانية أكبر عائق للميزة التنافسية
شركات كبيرة بمقدورها تدفع الملايين لتتميز 🤑
بمقابل مشروعك الجديد اللي ميزانيتك أقل بكثير من ملايينهم!
لكن الشركة اللي دفعت الملايين بدت بأقل من ميزانيتك استمر و راح تكتسح السوق😉
المعوّق الثاني، غياب الشفافية مع عملائك!
نقصد هنا ممكن تقدم ميزة مو موجودة عند غيرك لكن فيها عيوب مخفية أو زي ما نقول “ملمّعة”.
نعطيكم مثال:
شهد شافت إعلان بإنستقرام 📲 (نقدم لكم أفضل أنواع العسل الطبيعي و بسعر رمزي 💸)
عجبها جودة العسل المعروض بمقابل السعر المغري😍 راحت طلبته ووصل ..
ولكن مع الأسف علبة العسل من أصغر ما يكون! وكان السعر المدفوع أكثر من الكمية😒
وهنا نقول لك: خلك واضح مع عملائك وخلك دقيق وصريح بمواصفات مُنتجك 🍯
لكن بالنهاية لازم نذكركم بأن كل طريق نجاح فيه مطبات 🛣
عطيناكم الخلطة السرية .. عشان تتفادون المطبات وتوصلون بطريق أسرع من منافسينكم😎
خلك مثل ستاربكس، ولا نقول أحسن منه؟
كُتب بواسطة: نوره الرزين -رغد العتيبي - نوره العثمان